By Simanga Mtetwa
Emaphoyisa esifindza seMpumalanga asigcekile sesento sekubulalana kwemadvodza lamabili lebekabomakhelwane endzaweni yase Boschfontein kumasipala weNkomazi.
Umbiko lowetfulwe maphoyisa uvete kutsi lamadvodza bekumatse nelulwimi futsi aphindze abebomakhelwane, kepha kucabana kwabo kugcine sekuholela kutsi laba lababili bagcine sebandlula emhlabeni.
Emaphoyisa asendzaweni yase Schoemasdal atsi atfole umbiko ngelucingo kutsi kunetigulane letisesibhedlela letichazwe njengaletilimele kabi kakhulu. Munye walamadvodza bekavuvuke buso aphuke umhlatsi kanye nemkhono, lolomunye yena bekanelidvuma enhloko lekubangelwe kutsi bamphisele ngelizembe.
Lamadvodza lamabili lasemkhatsini kweminyaka lengemashumi lamatsatfu nakunye( 31) neminyaka lengemashumi lamane nakunye (41) budzala abese ayendlula emhlabeni ngemsombuluko wamhla tisihlanu 5 kulenyanga yeNyoni . Lesehlakalo senteke ngentsatsa kusa yangemsombuluko wamhla tisihlanu kulenyanga yeNyoni, noma kunjalo kusengakacaci kutsi ngabe yini lena lesuse lengcabano kulaba lababili. Emaphoyisa sekasungule luphenyo mayelana nalesehlakalo.
Nkomishana wemaphoyisa kulesifundza seMpumalanga Lieutenent Semakaleng Daphney Manamela uchaze lesehlakalo sekundlula emhlabeni kwalamadvodza lamabili njengalesibuhlungu, Manamela uphindze wacela emalunga emphakatsi kutsi asukumele kuyofuna lusito umakubakhona tehlakalo tekucabana nekungaboni ngasolinye ikakhulu kubantfu lababomakhelwane.
