By Simanga Mtetwa
Umuntfu lomsikati loneminyaka lengemashumi lamatsatfu nesitfupha budzala (36) , uboshelwe egedeni lesikhungo lesigcina labo lesebadvonsa sigwebo sabo endzaweni yase Bethal kulesifundza sempumalanga.
Kuboshwa kwakhe kute ngemuva kwekutsi atfolwe netidzakamiva lebekatifihle ekhatsi ephepheni lelimnyama lebekalifake ekhatsi empahleni yakhe yekucalisela.
Emaphoyisa atsi ngembi kwekutsi avunyelwe kutsi angangena ayovusela sihlobo sakhe lomuntfu lomsikati bacale ngekumsesha njengendlela yekulandzela umtsetfo walesikhungo, kepha kutse ngalesikhatsi basachubeka nekusesha emtimbeni wakhe batfola liphepha lelimnyama lebelifihle emaphilisi latidzakamiva lalinganiselwa kumashumi lasihlanu nemfica(59) kanye nalamanye emapheshana lebekufakwe kuwo lokusamacembe , kantsi kuphindze kwatdolakala nelibhodlelana lelincane lebelinemafutsa .
Lesehlakalo senteke egedeni lesikhungo lesigcina bantfu lebadvonsa sigwebo endzaweni yaseBethal ngalwesibili wamhla tingemashumi lamabili nesikhombisa(27) kulenyanga lesetulu.
Lorraine Nomsa Makhubele ubese uboshelwa endzaweni yesehlakalo ngemuva kwekutsi labo lebagadza tiboshwa babite emaphoyisa , kantsi uboshelwe emacala ekutfolakala netidzakamiva letingabita imali lengu 6000 wema randi ngentsengo yasestaladini ngalokungekho emtsetfweni, kuphatamisa sandla semtsetfo nekushushumbisa tidzakamiva.
Mahubele bekavele kafishane enkantolo yamatji yaseBethal ngalwesitsatfu mhlaka 28 , kepha lelicala lihlehliselwe embili. Lelicala litawuphindze libuyele enkalo mhla tisihlanu (5) Impala , kantsi ngemuva kwekuboshwa kwa Makhubele emaphoyisa abese ayophenya lapho lesihlobo bekatosivusela silalakhona , nalapho kubese kutfolakala kutsi naye ufihle insango phansi kwembhedze wakhe. Kulindzeleke kutsi lesiboshwa naso siphindze siyomisa timbilapho enkantolo malibuyela lelicala ngamhla tisihlanu Impala.
Nkomishana wemaphoyisa kulesifundza sempumalanga Leutenent General Semakaleng Manalela uwuncomile umsebenti lowentiwe ma Warder ngekuboshwa kwalowesifazane.
